Vryheid volgens die Bybel is ’n besondere ryk woord en gaan veel dieper as die oppervlakkige idees van vryheid wat die wêreld aanbied. Vryheid is nie beperk tot veiligheid nie, dit is nie beperk tot stemreg nie, dit is nie ‘n klein dorpie met kinders in die strate nie.
In die samelewing word vryheid dikwels gelykgestel aan die afwesigheid van beperkinge, ’n toestand waarin iemand kan doen wat hy wil. Hierdie wêreldse siening van vryheid is egter gebrekkig, omdat dit nie rekening hou met die dieper slawerny van die menslike natuur nie—slawerny aan die sonde.
In die Bybel, en spesifiek in die lig van die evangelie van Jesus Christus, het vryheid twee duidelike aspekte. Eerstens behels vryheid ’n vrymaking van iets—soos sonde, onderdrukking, en die heerskappy van die duiwel. Tweedens behels dit ’n vrymaking tot iets—soos die vryheid om God te dien, in gehoorsaamheid aan Sy gebooie te lewe, en werke van geregtigheid en aanbidding te verrig.
Vrymaking van die sleg
Die eerste aspek van vryheid, die vrymaking van sonde, is sentraal tot die Bybel. Die Here Jesus self het in Johannes 8:34-36 verklaar: “Elkeen wat die sonde doen, is ’n slaaf van die sonde… As die Seun julle dan vrygemaak het, sal julle waarlik vry wees.” Die mens, as gevolg van die val van Adam, is in ’n toestand van slawerny aan die sonde gebore (Romeine 5:12). Dit beteken dat ons, van nature, nie in staat is om God se wil te doen of ons eie redding te bewerk nie. Hierdie slawerny aan die sonde bring skuldigbevinding voor God en lei tot ewige verdoemenis as dit nie bely word nie.
Christus se verlossingswerk aan die kruis het egter vir ons die weg na ware vryheid geopen. In Sy kruisdood en opstanding het Hy nie net die mag van die sonde oor ons lewens gebreek nie, maar ons ook bevry van die straf wat ons toekom. Dit is die groot barmhartigheid van God, dat Hy ons sonde op Christus geplaas het, sodat ons vry kan wees van die vloek van die wet (Galasiërs 3:13). Hierdie vrymaking is nie bloot ’n regverdiging vir ons om in sonde voort te leef nie, maar ’n werklike bevryding wat ons toelaat om in die nuwe lewe van geregtigheid te wandel (Romeine 6:18).
Vrymaking vir die goeie
Die tweede aspek van vryheid is egter net so belangrik. Wanneer Christus ons vrymaak van sonde, bevry Hy ons tot ’n lewe van gehoorsaamheid en goeie werke. Die moderne idee van vryheid wat daarop fokus dat ons doen wat ons wil, is nie die Bybelse vryheid nie. Ware vryheid, soos dit in die Bybel verstaan word, is die vermoë om te lewe volgens die doel waarvoor ons geskep is—naamlik om God te verheerlik en Hom te eer.
Efesiërs 2:10 sê duidelik dat ons “geskape is in Christus Jesus tot goeie werke wat God voorberei het, sodat ons daarin kan wandel.” Hierdie vryheid tot goeie werke is ’n direkte gevolg van ons verlossing. Ons goeie werke verdien nie ons verlossing nie, maar is die vrug van die verlossing wat Christus vir ons bewerk het.
Boonop word ons deur die Heilige Gees in staat gestel om in hierdie vryheid te wandel. Die Heilige Gees werk in ons om ons heilig te maak en ons te lei tot ’n lewe van geregtigheid. In hierdie sin is vryheid nie die afwesigheid van reëls of wette nie, maar die krag om in ware gehoorsaamheid aan God te lewe.
Kies ons vryheid?
In die lig van die Skrif, is ware vryheid nie bloot ’n negatiewe vryheid—vry van onderdrukking, sonde, en straf nie—maar ook ’n positiewe vryheid—vry om God te dien, om in gehoorsaamheid en goeie werke te lewe. Christus het ons nie net bevry van iets nie, maar ook tot iets: tot die doelgerigte, vreugdevolle lewe in Sy teenwoordigheid. In Orania beteken dit onder andere dat ons die vryheid moet hê om ons eie owerhede te verkies wat volgens die wil van God regeer. Hierdie vryheid is die hoogste vorm van lewe, en slegs deur die werk van Christus en die inwoning van die Heilige Gees kan ons dit ten volle ervaar.
Geskryf deur Alistair van Heerden (Medewerker van Begrond)
koerania.co.za