Begrond Instituut se rubriek in Orania se gemeenskapskoerant – Koerania https://koerania.co.za/
‘n Huis behoort ‘n mooi tuin te hê. ‘n Stad kan mooi wees. Hoe ons dink oor stede en tuine word beïnvloed deur hoe ons oor die paradys dink. Sommige kulture het die paradys-verhaal as deel van hulle mondering en ander weer nie. Die paradys idee is ‘n basiese Bybelse begrip. Die Bybel gebruik ‘n paar woorde om die paradys te verduidelik. In Afrikaans het ons die woord paradys gekry van die Griekse woord vir ‘n tuinpark (paradeisos). Dis bekend by ons dat die paradys ook die naam dra van ‘die tuin van Eden’ (Gen. 2:8) of die ‘tuin van die God’.
Eden – pragtige plesier
Wat beteken die Bybelse tuin van Eden vir ons wat in Orania bly en werk en leef? Die woord ‘tuin’ in Hebreeus dra die betekenis van ‘n omheining. ‘n Omheinde tuin, ‘n park, wat beskerming en bedekking bied. Die begrip ‘Eden’ in die Bybel beteken plesier, genot en vreugde. Die tuin van Eden beteken dus basies ‘n beskermde, omheinde aanplanting wat vreugde en genot verskaf. Die Here self het die eerste tuin geplant. In Gen 2:8 lees ons: “Ook het die HERE God ‘n tuin geplant in Eden, in die Ooste, en daar aan die mens wat Hy geformeer het, ‘n plek gegee.”
Sielsgenot
Dit volg direk op die skepping van die mens waar daar staan dat God die asem van die lewe in die neus van die mens geblaas het en die mens ‘n lewende siel geword het (Gen. 2:7). Die mens as lewende siel se eerste blyplek was ‘n tuin van genot. Dit dui op die beskerming en voorsiening van die Here vir die mens. ‘n Tuin as skepping van God gee aan die mens sielsgenot. Hier moet ons nou die fokus van die Bybel raaksien. Die vraag is: wie se vreugde is hier ter sprake? Baie duidelik wil die Here sien dat die mens as siel gelukkig en genotvol lewe. Maar die Bybel leer ook dat God sy vreugde en plesier wil deel en wil uitdeel. Die tuin van Eden beteken dus ten diepste die genot van God. Die Here leer in die Bybel dat die mens se skepping wesenlik deel uitmaak van God se vreugde wat Hy in Homself het en dat sy liefde vereis dat diè vreugde met die mens gedeel word (Eseg. 28:13, Spr. 8:27-31, Mat 25:23, Luk 23:43). Die tuin van God gee God Self vreugde en die tuin van God is om as mens in diè vreugde van God te deel.
Deel die geskenk
Dit beteken dat ons tuine op ons erf en huis, iets reflekteer van God se tuin. Wat is dit wat tot ons siel spreek as ons ‘n mooi tuin sien? Die antwoord is dat iets van die prag van God ons aanspreek. Prag roep om ‘n antwoord. Iets wat pragtig en mooi is, spreek ons siel aan oor hoe God se werk mooi is en dat sy Naam pragtig en heerlik is. Wanneer ons hierdie betekenis van Eden snap en beleef dan kom daar ‘n blywende verbintenis na vore naamlik dat prag en skoonheid wesenlik deel van die lewe van die geredde kind van God is. Hierdie prag van God se werk en Naam word vir ons gegee as ‘n geskenk. Ons kry deel aan hierdie geskenk deurdat Jesus Christus aan ons gegee is deurdat die Heilige Gees geloof in ons werk en Self in ons kom woon. Ons kan toegang kry tot die tuin van God, die vreugde van die Here, deur die persoon en werk van ons Here Jesus Christus (Joh. 14:6).
Godsgenieting in Orania
Wat beteken dit nou alles vir Orania? Die Bybel leer dat tuin en stad bymekaar hoort. Die tuin van God en die stad van God mag nie van mekaar af losgemaak word nie (Open. 22:2,14). Daarom behoort ons tuine mooi te wees op Orania, en ons stad wat ons in aanbou, moet ‘n pragtige stad wees. Dit moet ons siele vreugde gee as deelname aan die prag van God. Ons huise behoort mooi tuine te hê as lewende getuienis dat ons in genade deel in die vreugde van ons Here. Pragtige tuine in ‘n mooi stad is nie ‘n luukse nie – dis ons lewensasem omdat ons deel in die prag van God. Godsgenieting is ook om met ‘n mooi tuin ‘n mooi stad te bou.
Wikus Buys – Begrond