Lees Matteus 5:1-12 en Daniël 7:1-14
Fokus: Matteus 5:3b en Daniël 7:14
Hulle wat arm van gees is word salig genoem want aan hulle behoort die koninkryk van die hemele. Die seën van hulle wat arm van gees is lê daarin dat hulle die koninkryk van die hemele as erfenis het. En wat is hierdie koninkryk? Dit is die volheid van Christus se liefdesheerskappy. Dit is van Christus as koning, en van sy koninkryk wat Daniël 7:14 sê: “En aan Hom is gegee heerskappy en eer en koningskap; en al die volke en nasies en tale het Hom vereer; sy heerskappy is ‘n ewige heerskappy wat nie sal vergaan nie, en sy koninkryk een wat nie vernietig sal word nie.” Christus het heerskappy ontvang as ewige heerskappy. Dit het Hy ontvang nadat Hy vir sy kerk uit alle volke, tale en nasies gekruisig is. Hy het dit ontvang nadat Hy ook om hulle onthalwe die dood oorwin. By sy hemelvaart is Hy as Koning gekroon. Hy het sy Gees in hulle uitgestort om hulle aan sy liefdesheerskappy te onderwerp.
Hierdie koninkryk van Christus se liefdesheerskappy is heeltemal anders as enige aardse koninkryk. Aardse koninkryke is meermale gerig op eer en rykdom. Die lewe in aardse koninkryke is ook ’n lewe van wette en reëls. Die ryk van Christus is ’n ryk van verbondsgemeenskap met die Koning. Die ryk is ’n ryk van gemeenskap met God. Ons het in die koninkryk van God gemeenskap met Hom wat ’n welbehae het in hulle wat arm van gees is. Ons het gemeenskap met Hom wat sy Seun gestuur het om ons van die ewige oordeel te verlos. Christus laat hul deel in sy ewige verlossing. Hy laat ons uiteindelik ook deel in sy oorwinning oor die sonde en dood. Ons word nie deur die koninkryk van die hemele verslaan soos alle magte wat teen God in opstand is nie. Ons deel in sy oorwinning, in sy triomf. Die Skrif leer dat ons as’t ware saam met Christus regeer. Dit is reeds nou vir die burgers van God se koninkryk ’n werklikheid. Maar dit is nog ten dele ’n werklikheid. Christus het reeds die dood oorwin in sy opstanding. Hy regeer reeds as Koning oor alle dinge. Sy liefdesheerskappy het ook reeds deur die werking van sy Gees in ons harte aangebreek. Die koninkryk raak ook sigbaar as ons in ons dade wanneer ons in ons kerke, gesinne en gemeenskappe vir Christus as die enigste koning erken. Ons regeer ook selfs reeds saam met Hom. Dit doen ons deur te bid. Ons gebede is voor God se troon. Hy oefen sy heerskappy oor die aarde uit deur ons gebede te verhoor. Dit is waar van die gebede wat arm van gees volgens sy wil gebid word. So aan elkeen wat arm van gees is, behoort die koninkryk van die hemele alreeds. Daardie koninkryk word ook sigbaar in die werke van die koninkryksburgers.
Maar die koninkryk moet ook nog in volheid aanbreek. Dit sal gebeur wanneer Christus alles voleindig by sy wederkoms. Dit is dan wat Christus ten gunste van die behoeftiges en ellendiges sal oordeel en sy liefdesheerskappy oor die hele aarde sal uitbrei. Dan sal sy en ons oorwinning oor sy en ons vyande volkome realiseer. Dit is die hoop van hulle wat neergedruk in hul ellende die Here aanroep en op Jesus vertrou. Dit is die hoop van hulle wat arm van gees die belofte van die evangelie aanneem. Hulle erf ’n ryk waar die lig die duisternis verdryf. Hulle erf ’n ryk waar die uitroepe van ellende sal plek maak vir ewige lofsange. Hulle erf ’n ryk waar die oorlogskrete van die kerk vir die onverwelkbare oorwinningskroon verruil sal word. ’n Ryk waarin God self die nederiges teenoor hulle teëstanders sal verhef. Dit is die seën en saligheid vir hulle wat arm van gees is! Vlug daarom arm van gees na Christus. Kyk na jouself in die lig van Christus en besef hoe afhanklik jy van Hom is!
Theuns de Bruyn (Medewerker van Begrond)