Lees Matteus 5:1-12 en Matteus 21:1-11
Fokus: Matteus 5:5a en Matteus 21:5
Christus het ons nou reeds op twee belangrike eienskappe van sy koninkryksburgers gewys. Beide daardie eienskappe het te make met die gebrokenheid in en om onsself. Ons het gehoor dat die erfgename van Christus se koninkryk arm van gees is. Hulle besef dat hulle in alles afhanklik van die Here is. Ons het ook gehoor dat koninkryksburgers mense is wat treur. Maar hierdie arm van gees en treurgesindheid van die gelowiges bring by hulle ’n bepaalde gesindheid teenoor God en hul medemens na vore.
Christus sê in vers 5 van ons Skrifgedeelte: Salig is die sagmoediges
Maar wat beteken “sagmoedigheid”? Gewoonlik dink ons aan sagmoedigheid as “saggeaardheid”. Iemand wat sagmoedig is het geen harde woord vir sy medemens nie. Maar die woordjie wat in ons Skrifgedeelte met “sagmoedig” vertaal is, dui eintlik nie in die eerste plek op mense se gesindheid teenoor hul medemens nie. Dit gaan in die eerste plek oor hulle gesindheid teenoor God. Iemand wat sagmoedig is, is iemand wat buigbaar is in God se hand. Dit is iemand wat hom gewillig onderwerp aan God se Woord, sy wil en sy bestuur. Dit is die teenoorgestelde van hardnekkigheid. Die sagmoediges verset hulle nie in opstand teen God se Woord nie. Hulle berus gehoorsaam daarby.
Sagmoedigheid gaan dus ook sterk gepaard met nederigheid. Ons hoor in 1 Petrus 5:6 die opdrag: “Verneder julle dan onder die kragtige hand van God, sodat Hy julle kan verhoog op die regte tyd.” Iemand wat sagmoedig is verneder hom onder God se hand, God se bestuur. Hy werp sy bekommernisse op God, want hy weet en vertrou dat God hom versorg. Wanneer so ’n persoon deur die Here beproef word, dan vertrou hy in alle sagmoedigheid dat die Here dit vir hom ten goede sal laat meewerk. Wanneer so iemand deur die Here vir sy sonde getugtig word, dan verootmoedig hy hom.
Iemand wat sagmoedig is, is bereid om deur die Here reggebuig te word. So iemand wil hê die Here moet aan hom skaaf. Hy wil hê die Heilige Gees moet hom laat groei in heiligmaking. Hy is bereid om eerlik na sy sonde te kyk en daarteen te stry. Hy is bereid om hom te laat aanspreek. Daarom het sy sagmoedigheid voor die Here ook ’n geweldige uitwerking op sy verhouding met sy medemens. Dit beteken nie dat jy dan maar net altyd gewilling is en met jou laat mors nie. Baie keer praat mense so oor sagmoedigheid. Hulle dink sagmoedigheid teenoor die medemens is om eintlik maar net altyd toe te gee. Maar, sagmoedigheid is in baie gevalle juis die teendeel. Want wanneer iemand werklik sagmoedig is dan buig hy, nie voor mense of hulle verwagtinge nie, maar voor die wil van God.
Sagmoedigheid is dus nie ’n algemene tipe buigbaarheid nie. Dit is buigbaarheid spesifiek met betrekking tot God se Woord. Iemand wat sagmoedig is buig in elke situasie voor die wil en bestuur van God. Dit vereis dat ons baie keer moet standpunt inneem. Dit is die vrug van die geloof wat die Heilige Gees in ons werk. Daarom vra jouself of jou optrede in jou huwelik en gesin getuig van ware sagmoedigheid. Vra jouself of God se wil en bestuur jou hele optrede en gesindheid bepaal. Is jou gewoontes gerig op jouself? Of is jy buigbaar in diens van die Here?
Om sagmoedig te kan wees en bly is dit uiters belangrik dat ons ons oë op Christus hou. In Hom sien ons wat sagmoedigheid werklik behels. Hy was bereid om Hom gewillig onder die wil en bestuur van sy Vader neer te buig. Ons hoor daarvan in Filippense 2:6-8 waar Paulus leer: “Want hierdie gesindheid moet in julle wees wat ook in Christus Jesus was. Hy, wat in die gestalte van God was, het dit geen roof geag om aan God gelyk te wees nie, maar het Homself ontledig deur die gestalte van ‘n dienskneg aan te neem en aan die mense gelyk geword; en in gedaante gevind as ‘n mens, het Hy Homself verneder deur gehoorsaam te word tot die dood toe, ja, die dood van die kruis.” Christus het Hom tot die dood van die kruis toe neergebuig sodat ons met die Vader versoen kon word. Hy het dus ons verlossing uit sy sagmoedigheid uit vir ons bewerk. Daarom kon Hy ook in Matteus 11:29-30 leer: “Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig.” Christus is geen hardhandige slawedrywer nie. Hy is die Heer wat die toorn van God vir sy diensknegte gedra het. Hy het die juk van sy wet vir ons sag gemaak deur die wet in ons plek te vervul, deur die saligheid vir ons te verdien. Daarom kan ons sagmoedig wees. Ons kan buig onder die wil van God met vreugde, want sy wil het dit vir ons in Christus bewerk. Wees sagmoedig teenoor God want sy bestuur en wil is jou in Christus ten goede.
Theuns de Bruyn (Medewerker van Begrond)