Lees Matteus 5:1-12 en Jesaja 66:10-14
Fokus: Matteus 5:4b en Jesaja 66:13
Hulle wat treur oor die totaliteit van hierdie bedeling se sondegebrokenheid is salig. Hulle is geseënd, want Hy wat die koninkryk van die hemele bring staan in ons Skrifgedeelte voor hulle en preek. Hulle is geseënd, want Hy wat ’n einde aan die gebrokenheid gaan maak is hier. Christus se koms word immers die vertroosting van Israel genoem. Dit is Hy wat die volk wat in donker wandel sou kom troos. En wie is hierdie volk? Dit is die kerk in die Ou Testament wat verwag het dat die Messias se ryk moes kom. Dit is van hulle wat die Here in Jesaja 40 beveel het: Troos, troos my volk! En dit sou Christus doen deur die sondes van al sy uitverkorenes op Hom te neem, sodat dit voor die aangesig van die Vader nie meer sou bestaan nie. Dit is die troos vir elkeen wat treur oor die skuld van sy sonde. In Christus is dit vir ewig voor die Vader weggeneem.
Christus sou egter ook ’n einde aan die gebrokenheid maak deur uit die dood uit op te staan. As eersgeborene uit die dode is Christus die waarborg dat die vernuwing van sy ryk gekom het en dat dit ook nog in volheid sal kom. Vir die gebrokenheid, vir verganklikheid, dood en sonde sal daar geen plek wees wanneer sy koninkryk finaal kom nie. En deel van daardie finale vernuwing wat Christus bring, is die vertroosting van hulle wat aan Hom behoort. Hy sal hulle hartseer aanspreek sodat dit in uiteindelike blydskap omgesit sal word. En soos wat die koninkryk van Christus nie maar net ’n werklikheid van die toekoms is nie, so is die troos wat Hy deur die koms van sy koninkryk bring ook nie. Christus troos nou die wat treur. Hy doen dit deur sy Gees. Ons lees in Johannes 14:26 dat Jesus belowe: “maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het.” Christus troos ons deur die werk van sy Gees. Die Gees herinner ons aan alles wat Jesus gesê het. Hy herinner ons aan die Woord. Sy troos raak dus vir ons baie duidelik wanneer die Gees in ons werk wanneer ons na die prediking luister. Sy troos raak duidelik wanneer medegelowiges mekaar bystaan in tye van nood en swaarkry.
Maar die Gees troos ons by uitstek wanneer Hy ons aan God se heerlike beloftes vir ons herinner. So troos God ons deur sy Gees in die lewe. Hy laat ons leef, nie deur brood alleen nie, maar deur elke woord wat uit die mond van die Here kom. Maar Hy troos ons ook in die dood. Want in Hom wat die vertroosting van die treurendes belowe het is die sonde en dood ook oorwin. In beginsel het Christus al die gebrokenheid van die sonde reeds oorwin. En vanwaar Hy nou in die hemel heers brei Hy sy koninkryk, en ook sy troos uit. Hy brei sy troos uit wanneer treurende gelowiges by die kerk gevoeg word om in sy troos te deel. Hy brei sy troos uit wanneer verbondskinders in geloof begin treur en hulle troos in Hom vind. Christus gee sy troos wanneer Hy deur sy Gees en Woord in sy kerk reformasie bring. Hy troos hulle wat treur oor die afvalligheid en die sonde van die kerk. Die troos van die Here is iets waarin jy jou reeds kan verlustig as jy hartseer is vir die regte redes. Die troos van die Here is hier waar jy sy Woord mag hoor, waar jy in die gemeenskap van die gelowiges mag deel, waar jy ook mag beleef hoe Hy jou gebede verhoor.
Maar die volheid van sy vertroosting sal aanbreek in Christus se wederkoms. Wanneer die koninkryk van die hemele finaal kom en die hemel en aarde vernuwe sal word, dan sal ons ook volkome en finaal getroos word. Ons hoor van daardie vertroosting in Jesaja 52:11 waat die Here sê: “Jy, ellendige, deur storm gejaagde, ongetrooste! Kyk, Ek lê jou stene in sierklei, en Ek grondves jou in saffiere;en jou borswerings maak Ek van robyne en jou poorte van karbonkels en jou hele ringmuur van edelgesteentes.” Vir hulle wat treur laat die Here deel in die stad van edelgesteentes. So word die nuwe Jerusalem en daarmee saam die uiteinde van die gelowiges beskryf. Dan sal die gebrokenheid en sonde iets van die verre verlede wees.
Die seën van elkeen wat treur lê in die vertroosting wat die Here nou en in die toekoms gee. Gryp daaraan vas wanneer jy hartseer is oor die gebrokenheid! Sou jy treur oor jou sonde, in Christus is troos van God se genade. Sou jy treur oor die dood, in Christus is die troos van die opstanding. Sou jy treur oor die kerk, in Christus is die troos van sy belofte dat Hy met haar sal wees tot aan die einde. Sou jy treur oor ons volk te toestand, by God is niks onmoontlik nie. Dan sal ons as God se kinders waarlik kan saam met Jesaja 49:13 kan sing: “Jubel, o hemele, en juig, aarde; en berge breek uit in gejubel! Want die HERE het sy volk getroos en ontferm Hom oor sy ellendiges.”
Theuns de Bruyn (Medewerker van Begrond)