Lees Matteus 5:1-12 en Psalm 17
Fokus: Matteus 5:6b en Psalm 17:15
Die Here Jesus noem hulle wat van harte na geregtigheid honger en dors salig. Die rede daarvoor: Want hulle sal versadig word. Die belofte van die Here is versadiging. Dit behels dat die Here volheid en vervulling sal gee waar die sonde en die gebrokenheid leemtes gelaat het. En daardie vervulling gee Hy in die eerste plek sy uitverkorenes te laat deel in sy geregtigheid. Daardie geregtigheid waarna ons verlang sal aan ons toegereken word. Dit doen die Here immers in Christus. In Christus kan ons voor God se geregtigheid bestaan. Hy het immers ’n lewe van volkome geregtigheid in ons plek geleef. Hy het volkome gehoorsaam aan God se standaard vir geregtigheid geleef. Hy het ook vir ons ongeregtigheid gesterf in ons plek. Dit is ook Hy wat volgens Romeine 4:15: “opgewek is ter wille van ons regverdigmaking.” Hy het ons ongeregtighede voor die aangesig van die Vader verwyder deur daarvoor aan die kruis te betaal. Nou is dit in die lewende Christus voor die Vader asof dit ons was wat ’n lewe van volkome geregtigheid geleef het. So word ons deur die regverdigmaking van God versadig. Ons kan weet dat ons in Christus aan die geregtigheid van die Vader deel het, sonder om daardeur verteer te word. In Christus is ons voor Hom regverdig.
Die volheid van die gemeenskap met God is in Christus ons ewige erfdeel. Dit is die versadiging wat ons reeds nou ontvang. As jy met jou eie dade van geregtigheid probeer om die gemeenskap met die Vader te verdien sal jy dus nie versadig word nie.
Jou mooiste dade is bevlek met sonde, jy het die geregtigheid van Christus nodig. Dit is na Hom wat jy moet dors. Dit is Hy wat versadig. Wie glo in Christus sal honger en dors na sy geregtigheid en ook daarmee versadig word. Hy sal kan berus daarin dat Hy voor die Here regverdig is.
Maar, die ware gelowige sal ook versadig word deur die geregtigheid waarin die Gees van Christus hom lei. Wanneer die Heilige Gees ons vernuwe na die beeld van Christus dan groei ons in geregtigheid. Ons rig ons woorde ons dade en ons gedagtes volgens die regverdige wil van God. Christus het ons sondes gedra sodat ons ook die sondes kan afsterf en vir God se geregtigheid kan lewe. Die Heilige Gees vernuwe ons dat ons in daardie geregtigheid groei. En wanneer ons so groei dan word ons versadig. Want hoe meer ons die beeld van Christus vertoon, hoe dieper en heerliker word ons gemeenskap met God. Daarin lê die versadiging! Ons word versadig in ons regverdigmaking, maar ook in ons heiligmaking.
Maar dan word ons ook nog versadig deurdat die Here ons as regverdiges behandel. Omdat ons in Christus aan die Here se geregtigheid deel het, behandel Hy ons as mense wat beloon moet word. Daarom kan ons ook pleit op sy geregtigheid wanneer ons in hierdie lewe verontreg word. En wanneer Hy ons verhoor, dan leer ken ons reeds die versadiging van geregtigheid wat in Hom is.
Maar vir hulle wat honger en dors na die geregtigheid is daar ook nog die groot versadiging in die toekoms. Dit is wanneer die Here in geregtigheid die wêreld sal oordeel. Daardeur sal Hy sy volk verlos. Daardie oordeel in geregtigheid is iets waarna ons moet uitsien. Dit is iets waarna ons moet honger en dors. Want wanneer Hy dan die skepping vernuwe sal daar niks anders as sy geregtigheid oorbly op die aarde nie. Wanneer ons uiteindelik verheerlik word dan is die ongeregtigheid finaal iets van die verlede. En dan sal skaarste, honger en dors ook iets van die verlede wees. Ons sal ons verlustig in die heerlike gemeenskap wat ons in ware geregtigheid en heiligheid met Hom mag hê. Dit is die uiteindelike versadiging waarna die hongeres en dorses mag uitsien.
Christus beloof versadiging vir hulle wat honger en dors na die geregtigheid. As jy dus daarna verlang, dit is reeds in Christus te vinde. Maar dit gaan ook in die toekoms geopenbaar word. Hou dus jou oog op Christus wanneer jy aan jou eie regverdigheid voor God twyfel. Hou jou oog op Hom wanneer jy met die ongeregtigheid in jouself stryd voer. Hou jou oog op Hom wanneer die ongeregtigheid in die wêreld jou honger en dors laat. Vind jou verwagting in die woorde van Psalm 98:7-8: “Laat die see bruis en sy volheid, die wêreld en die wat daarin woon. Laat die riviere in die hande klap, die berge tesame jubel voor die aangesig van die HERE; want Hy kom om die aarde te oordeel; Hy sal die wêreld rig in geregtigheid en die volke met reg.”
Theuns de Bruyn (Medewerker van Begrond)