Lees Matteus 5:1-12 en Psalm 37
Fokus: Matteus 5:5b en Psalm 37:11
Die sagmoediges word gelukkig, salig en geseënd genoem omdat hulle die aarde gaan beërwe. Dit is ’n geweldige belofte. Dit val ook vreemd op die oor. Hoe kan dit die sagmoediges wees wat die aarde beërwe? Mens sou dit eintlik nie verwag nie. Mense wat in die geskiedenis groot dele van die aarde oorgeneem het was alles behalwe sagmoedig. Hulle was magsgedrewe. Hulle het nie ander gedien nie, maar eerder gesorg dat hulle gedien word.
Maar die sagmoediges sal die aarde erf omdat die oorsprong en doel van die aarde kom van Hom voor wie hulle sagmoedig is. Die sagmoediges sal die aarde erf want hulle behoort aan die Koning wat sy lewe vir hulle afgelê het. Die wêreld het deur Hom ontstaan. Dit is ook Christus wat die aarde na die voleinding toe sal voer. Trouens, alle mag in die hemel en op die aarde behoort aan Hom. Hy het deur sy kruisdood en opstanding die owerste van hierdie wêreld, die duiwel, beslissend oorwin. Aan die greep wat die duiwel en sy magte op die die mens het, het Christus in beginsel ’n einde gemaak. Christus het die duiwel en sy magte se greep op die aarde in beginsel oorwin. Hy het hulle aanspraak op die skepping tot niet gemaak. Hy het reeds oorwin. Maar Hy sal ook as Owerste oor die konings van die aarde die geskiedenis na sy finale oorwinning toe voer. Hy sal sy koninkryk uitbrei en uiteindelik al die koninkryke wat teen Hom in opstand is vernietig. Dit is die waarvan Dawid profeteer in Psalm 2:7-9:“Ek wil vertel van die besluit: Die HERE het aan My gesê: U is my Seun, vandag het Ek self U gegenereer.Eis van My, en Ek wil nasies gee as u erfdeel en die eindes van die aarde as u besitting.U sal hulle verpletter met ‘n ysterstaf, U sal hulle stukkend slaan soos ‘n erdepot.”
Die sagmoediges sal die aarde erf, want hulle Koning het dit vir hulle gewen. Hy sal oorwin, sodat sy ryk alleen op die aarde oorbly. Sy sagmoediges sal daarin deel. Maar nou kan ons egter steeds vra: Hoekom word dit van die sagmoediges spesifiek gesê? Hoekom pas hierdie belofte by sagmoedigheid? Sou dit nie beter by een van die ander saligsprekinge gepas het nie? Christus belowe dit hier omdat dit eintlik net sin maak. As sagmoedigheid beteken iemand is buigbaar voor die Woord en bestuur van die Here, dan maak dit net sin dat so iemand die aarde in ontvangs sal neem. Want wat beloof God in die Woord. Dit beloof die aarde aan hulle wat werklik in Christus glo. Iemand wat dus buig voor die Here se Woord het as toekomsverwagting die ewige lewe op die aarde. Dit is iemand wat dus anders dink oor die aarde waarop ons leef. Dit is iemand wat sagmoedig uitsien om die aarde as beloofde land te erf. 2 Petrus 3:13 stel dit so: “Maar ons verwag volgens sy belofte nuwe hemele en ‘n nuwe aarde waarin geregtigheid woon.”
Maar, die sagmoediges buig ook voor die bestuur van God. Dit beteken hulle berus hulle by dit waarheen die Here die geskiedenis stuur. Hy bestuur dit immers na ’n punt toe en daardie punt is die vernuwing van die aarde. Daarom stel Christus dat dit juis die sagmoediges is wat die aarde sal erf. Om te buig voor God se Woord en bestuur is om te berus in jou erfenis. Dit is die verwagting en erfdeel van die sagmoediges, nie die hardnekkiges nie.
Maar, broer en suster, soos met die geheel van ons koninkrykserfenis, is dit nie net ’n erfenis van die toekoms nie. Dit is ook nou besig om te realiseer. Ons is reeds nou erfgename van die aarde. Wanneer ons die Here bid om ons in ons arbeid te seën, dan verwag ons dat Hy ons uit die aarde sal seën. Wanneer ons bid vir ons daaglikse brood, dan verwag ons dit as seëning uit die Here se hand. Die Here gee reeds uit sy genade vir ons ruimte om te lewe, ruimte om Hom te dien. Hy voorsien dit tog op geen ander plek as op hierdie aarde nie. Gebruik daarom die middele en seëninge wat jou uit God se hand toekom, om Hom alleen te dien. Dit wat die Here vir jou op aarde gee moet ook tot sy verheerliking in jou lewe dien. Jy het die ewige lewe immers reeds nou. Maar die finale triomf van Christus sal die aarde nuutmaak en dan sal die aarde in geheel aan die sagmoediges behoort.
Die toekoms van die aarde is in Christus gebêre vir die sagmoediges. Buig jou daarom neer voor Hom, want Hy is Here. Hy voleindig die geskiedenis volgens die beloftes van God ten gunste van die sagmoediges. Slaan daarom ag op die woorde van Psalm 25:12-13: “Wie tog is die man wat die HERE vrees? Hy sal hom leer aangaande die weg wat hy moet kies. Hy self sal vernag in die goeie, en sy nageslag sal die land besit.”
Theuns de Bruyn (Medewerker van Begrond)