Lees Matteus 5:1-12 en Psalm 119:121-136
Fokus: Matteus 5:6a en Psalm 119:123
“My oë smag na u heil en na die belofte van u geregtigheid.” So klink die hartsbegeerte van die regverdige. Dit gaan om die Here se geregtigheid. Christus het ons nou reeds in die bergrede geleer hoe die ware burgers van sy koninkryk lyk. Hulle besef dat hulle in alles van die Here afhanklik is. Hulle treur oor die sonde en die gebrokenheid daarvan. Dit lei hulle om hulle onder die Here neer te buig. Dit is wat sagmoedigheid beteken. Dit is om voor die wil van die Here te buig. So lyk die gesindheid van die ware gelowiges. Maar die koningkryk van God en die vernuwing wat die Gees daarin bring bring nie net by die gelowiges ’n bepaalde gesindheid na vore nie. Dit bepaal ook hulle begeertes.
Iemand wat vir die Here leef en as wedergeborene in sy koninkryk leef, se wil en begeertes het verander.
Jesus leer in ons Skrifgedeelte: Salig is die wat honger en dors na die geregtigheid. Geseënd, gelukkig, salig is hulle na die geregtigheid honger en dors. Alle mense ken honger en dors. Wanneer jy fisies honger en dors is dan sê jou liggaam vir jou daarmee dat jy moet eet en drink. Wanneer jy honger en dors is dan wil jy jou versadig met dit wat jy nodig het. Jy begeer ernstig die middele wat jou aan die lewe hou. Maar die honger en dors wat die saligheid van gelowiges merk is geestelike honger en dors. Dit is as’t ware ’n geestelike aptyt of eetlus. In ’n sekere sin is dit ook iets wat alle mense ken. Alle mense honger en dors na iets waarin hulle hul lewensversadiging soek. Meestal honger en dors mense na geluk. Mense begeer tog ten diepste om maar net in die lewe gelukkig te wees.
Maar die feit dat daar in mense honger en dors is, impliseer dat daar skaarste is. Daar is ’n gemis. Wanneer daar seën en oorvloed is sal mense nie nodig hê om te honger en te dors nie. Dit geld natuurlik vir geestelike honger en dors ook. Mense honger en dors na verskeie dinge om die skaarsheid en gebrek wat vanweë die sonde in hierdie lewe is vol te maak. Dit geld ook vir geestelike skaarsheid en gebrek. Mense honger en dors om daardie seer wat die sonde en die gebrokenheid in die lewe bring heel en vol te maak. Maar, ongelukkig soek mense daardie vervulling in afgode. Hulle soek dit in drankmisbruik. Hulle soek dit vandag al hoe meer in pornografie. Hulle soek dit in prestasie en in welvaart. Lewensvervulling en geluk word op baie plekke gesoek. Dit word hongerig en dorstig nagejaag. Daarom kan mense ook net nie genoeg daarvan kry nie. Dit bied uiteindelik geen versadiging nie. Die rede daarvoor, hulle honger en dors nie na die een ding waarin hulle versadiging sal vind nie. Hulle honger en dors nie na die geregtigheid nie.
Wat bedoel Christus hier met die geregtigheid? Die kern van die woordjie “geregtigheid” is “reg”. Geregtigheid verwys na wat reg is. Nou is dit so, mense honger en dors in die algemeen na ’n tipe geregtigheid. Ons hoor baie dat mense begeer dat daar aan hulle reg gedoen moet word. Ons hoor baie uit die mond van gelowiges en ongelowiges dat ’n sekere ding nie “reg” is nie. Maar die geregtigheid waarvan die Bybel praat is nie “geregtigheid” in die oë van mense nie. Dit is geregtigheid en reg volgens God se standaard. Dit is immers die enige standaard waarvolgens “geregtigheid” gemeet kan word. Daarom leer ons in Psalm 119:142 aangaande God: “U geregtigheid is geregtigheid tot in ewigheid, en u wet is waarheid.” Ware geregtigheid kom van die Here af. Iets is reg as Hy sê dit is reg, as dit met sy wil ooreenstem.
Die begeerte van ware gelowiges was deur die eeue dan ook uiteidelik God se geregtigheid. Hulle het gehonger en gedors om in die Here se geregtigheid te deel.
Dit beteken dat hulle in die eerste plek honger en dors om reg met God te wees. Deur die sondeval is ons van nature nie reg voor God nie. Ons kan van nature nie voor sy geregtigheid bly bestaan nie. Die regverdige straf op ons sonde is die dood. ’n Wedergeborene begeer om voor die geregtigheid van God te bly bestaan. Honger en dors na die geregtigheid is in die eerste plek die begeerte om reg te wees voor God. Dit is alleen in Christus moontlik. Ons kan alleen voor God regverdig wees as Jesus vir ons borg staan. Dit beteken sy bloed bedek ons sondeskuld. Dit beteken ook die sy volmaakte regverdigheid word aan ons toegereken. Dan leef ons as regverdiges. Die geregtigheid van God kry hoe langer hoe meer in ons lewens gestalte. Daartoe werk die Heilige Gees in ons.
Maar gelowiges begeer dat die geregtigheid van die Here ook in ander mense se lewens sal sigbaar word. Gelowiges begeer dat dit sigbaar word in hulle gesinne, in die lewe van hulle kinders. Maar uiteindelik is die honger en dors van die gelowiges dat die geregtigheid van die Here in alles en oor die hele aarde sigbaar sal wees. Daarom kan hulle ook Psalm 10:15 bid: “Verbreek die arm van die goddelose en slegte; besoek sy goddeloosheid totdat U niks vind nie!” Die belofte dat die Here daardie geregtigheid oor die aarde sal sigbaar maak is in Christus bekragtig. Hy sal dit bring. Hy is ons hoop op versadiging.
Theuns de Bruyn (Medewerker van Begrond)